• Tany misy olona

    Tany tsy tonga hasina

    Fa mitsirepirepy manaraka ny filapon’ny bedidy

    Tany misy ringana

    Ringana ny ala fanaoko trano satrana: nisy nangalatra

    Ritra ny vatoko be ranomaso: nisy nipaika

    Lany ny vorombola mpanaitra maraina: nisy nikepoka

    Fongana ny vato fanondrana, vato fitorak’amboa no hany tavela

    Tsy misy afa-ts’io olona io sisa eo.

     

    Olona tsy tonga hasina

    Fa manindron-defona ny tontolony.

     

    Finaritra ve ianao hihaino ny dradradradram-boary

    Mandalo tetezana makina

    Mitazana ny vahoaka sy ny biby samy: tsy manan-kialofana?

     

    Inona no hovimbinina rehefa atsy ho atsy

    Rehefa hamangy ny anjara orany ny olona nasondrotry ny nofo?

    Tany haraka takovana-nenina sa ranomaso iray siny diso aoriana?

     

    Iriko ry sakaizako

    Hanam-pamaky koa ny voary: hanapahany hevitra

    Hanan-tsaina koa androngo: hisamborany mpandripaka

    Hanam-pahefana amin’ny olona ireto fataony tetezana hitàna

     

    Ary mba samy hametraka ny hasiny

    Eo anjoron’alahamadiny

    Izao voary rehetra izao

     

    Ny Ampinga

    « SEDRAFOLAKA ERITRA »