• Fifonosana mamelona

    farara tsy tsofina tsy maneno

    fahafaham-baraka rahalahy no kitapo nifonosantsika
    fony vao te ho àry isika!
    saingy isika izao no nahafaty, ilay andrarezina mpandoatra hasambarana,
    mpandena ny atin’akanjon’ny isam-batan’olona
    vao velona tao anaty.

    Hitoetra ho tandindona miara-halevona amin’ny aloka ny anarana
    fa sarotra kosehina kosa ny aingam-pamoronana natao tao anaty sasak’alina
    io ilay aina, nampifoha ny fanahy sy nampandosirantsika torimaso
    fa isika rahalahy zanaky ny haizina!

    Ary injay ny feo, midradradradra, hiaka fanomboan’ny fijaliana
    mpahazo ny olom-belona, fa mba re teny amintsika
    tao anaty efitranon’ny fiandrasam-belona.
    toa hasambarana sahady no fandraisan’ireto havantsika
    ny aina tonga an-tany
    satria nitombo isa angamba, ny kilalaon’ny fahoriana.

    Any rahalahy ny namako
    hatramin’ny fahalebiazany mbola nitahiry ny mosoaram-pahazazany
    tsy maina hatramin’izao!

    Ento amim-panahy miahy ny ahiahim-piainana tsy resy
    fa efa lany am-panombanana ny antony mampisy ny isan-tsika.
    samy mifamoa, mifamelona ho vanona.
    dia hitoetra rahalahy ny fanahy mampiaina.

    Fanamboarampanahy

    « Dona ny endrinaLoatr'olona »