• EMBONA LAVI-MALALA

     

    Indraindram-po milako …vetsovetso

    No manainga ny embonembona aman-tsento

    Ontsaontsam-pitarainana manako

    No miloatra anatiko ao tsy mety miato

     

    Trahotrahon’oram-baratra mavany

    Korian-dranomaso miainga tsy ho lany

    Kiakiam-po maratran’alahelo

    Fisendaoram-pijaliana toa manelo

     

    Hetraketram-panaintainana mandroatra

    Vaingam-pahoriana anaty fo

    mivoaka akoakon’ny toloko mahonena

    No mameno sy manenika ny tena ….

     

    Fa nahoana ary? hoy ianao manontany

    Dia izao no havaliko an’izany …..

    Raha takariva an-tanin’olona manin-kavana tsy foy

    Ny foko sarak’olon-tiana , ka manjaika sy mandrohy

     

    Ilay fitiavanay mahantra ,tafasaraka tsy fidiny

    Mampigoka ny mafaitra , toa tsy ho telina ny ngidiny!

    Ny ankizy ilaozan’ny sakaizany no milalao vovoka irery ,

     Fa ny foko lavitra azy mahatsiaro tena very!

     

    Ka ny vetsom-po no atopy mba hivimbina vinany

    Hambomba ilay fony tia any an-tany lavitra any

     

     

    AINGAM-PANAHY F.S

    « Aingam-panahy Feon'ny Saina... »

  • Commentaires

    Aucun commentaire pour le moment

    Suivre le flux RSS des commentaires


    Ajouter un commentaire

    Nom / Pseudo :

    E-mail (facultatif) :

    Site Web (facultatif) :

    Commentaire :