• Ireo randran-drandran-teny
    Navoinako teny ho eny
    Nampiarahiko tsipelina
    Tsy nisy iray nielina

    Nolaroina ainga ombam-panahy
    Nofaingoina ireo tsiahy
    Narafitra ho fehezana
    Ka ilay rima no tetezana

    Kalokalom-pitiavana
    Fahalavoana, finiavana
    Narangotra ho diam-penina
    Arafitra ho tsara tenona

    Io ilay tena avy ao am-po
    Tsy ho lefy tsy ho lo
    Miboiboika toa loharano
    Mibosesika tsy omby trano

     

    Haja Andriamahazonoro


    votre commentaire
  • Antson’ny hanina tsy taka-dranomaso

    Mitsena ny ratsan-tanan’ireo saiky tiana

    Tonga teo atsasa-dalana fa navelan’ny tadidy

    Ho rendrika mora sy ho ritra tsiaro.

     

    Mamangy amin’ny fitiavana 

     

     

    Latsaka an-dalana fa latsa-pitiavana

    Tsy hay nampitoniana fony iny nametrahana tantara

    Tsy hay nampitoniana fony iny napetraka sisa ho tantara…

    Fa mifika ranomaso amoron’ny fon’ny manadino.

     

     

     

    Tsy mety misondrotra ny resaka famafana alahelo

    Ka na tapa-teny aza tsy tongako ho anao

    Hanalefaka ny vay, manomboka maniry

    Hamela holatra saro-miala ao anaty.

     

     

     Nisy dingana nampaniry hetaheta

    Nitory koa ny feon’ny nofo hiara-miaina

    Raha ny faniriany dia mba hiaraka hitoetra

    Saingy ringitra ny toky, naniry teo fa maina.

     

    Ny Ampinga


  • Afa-miala fa tsy afa-mihetsika

    Afa-baraka fa tsy mahatsiaro henatra

    Afa-po  fa tsy mahafoy

    Afa-nenina fa tsy afak’alahelo

    Afa-mamela fa tsy afa-manadino

    Afa-bizaka fa mbola te ho reraka

    Afa-piakarana fa tsy mety midina

    Afatrafarako fa tsy mety tonga…

    Dia…

    Tonga fa tsy mety manatona

    Tonga-saina fa lasa ambiroa

    Tonga-fofona fa kely angovo

    Tonga-volana fa very tadipoitra

    Tonga-maraina fa tsy nety nody

    Tonga-antseranana fa very fivoy

    Tonga manasina fa tsy mba manaja

    Tonga ihany fa teo ambavahady

    Tonga tapany ilay erany teo

    Tonga any amin’ny ela…

    Ela ho’aho

    Elanelanin’ny tany vao mifankatia

    Ela ny ela tany vao nakaty

    Ela velona vao ratsy fanahy

    Ela nandrasana vao be fanozonana

    Ela niandrana vao kizo fara

    Ela nangadiana ka sendra vatolampy

    Ela fiketrika ka noketrehan’ny hafa

    Ela nitenenana ka nitsako lalitra

    Ela, nahatonta ny vao…

    Vao teo isika no nifanainky

    Vao ny an-tendromolotra no vita

    Vao ny iraisam-po no tafita

    Vao ny iray dia no voaasa

    Vao ny fanahy no mifampitantana

    Vao tia aho dia tapitra

    Vao lasa ianao dia tonta aho

    Vao renoka aho dia taitra ianao…

     

    Ny Ampinga

    Martsa 2014


  • Ny zavatra mba nilainay anie ho'aho dia ny mba hiara-hiaina aminareo e,

    hizara ny hatsembohanareo fotsiny,

    hiraradraraka tsy misy fetra;

    dia mba hiara-hiasa ama-minitra kely hamokatra kely be dia be…

    Fa ianareo malailay tsy mety tia anay foana,

    nefa miara-mihosona sy miara-mionona aminay marain-dava izao…

    Nefa avelanareo hilalao (ny) tanana izahay,

    avelanareo hiraviravy tsy hay tanana ny fanirinay,

    dia modinareo tsy hita akory koa aza ny am-pahany betsaka mba efa natolotray ho hajan-tsata mifono ao aminareo.

    Ritra ihany ity rano an-tsinibe tany ity rey olona,

    nefa ny hetaheta tsy afaka…

    ritra ihany ho’aho ny rano nefa tsy mba nisy nisotro fa very nitsika moramora…tao…

    Ny zavatra mba nilainay anie ho’aho dia ny mba hiara-hiaina aminareo e,

    hizara izay mba azo zaraina sy hanolotra izay mba azo hifanolorana;

    dia mba tapitra izay izahay sy ianareo izay…






    Suivre le flux RSS des articles
    Suivre le flux RSS des commentaires